বিগত বছৰবোৰৰ দৰে এইবাৰো ,বঙাইগাঁও শোধনাগাৰ উপনগৰী সমন্বয় সংস্থাই বাৰেৰহণীয়া কাৰ্যসূচীৰে "জয়মতী দিৱস "উদ্ যাপন কৰে ।
তদুপলক্ষে শোধনাগাৰ বিনোদন কেন্দ্ৰৰ প্ৰেক্ষাগৃহত
২৭ মাৰ্চৰ সন্ধিয়া বন্তি প্ৰজ্বলন ,স্মৃতি তৰ্পণৰে মহীয়সী গৰাকীলৈ শ্ৰদ্ধা নিবেদন কৰা হয় ।
সাংস্কৃতিক কাৰ্যসূচীৰ পূৰ্বে সৰ্বাংগসুন্দৰ প্ৰাচীৰ পত্ৰিকা "সমন্বয়ৰ সমলয় " উন্মোচন কৰি বঙাইগাঁও শোধনাগাৰৰ জি এম এইচ আৰ চন্দ্ৰিমা শৰ্মাই হীৰুদাৰ কবিতা পাঠ কৰে ।
জিএম এইচ আৰ সীতা বৰুৱাকে মূখ্য কৰি শোধনাগাৰ কৰ্ত্তৃপক্ষৰ বহুকেইগৰাকী বিষয়ববীয়া আৰু বিশিষ্টা মহিলাৰ উপস্থিতিত সমন্বয়ৰ সাহিত্য বিভাগে যুগুতাই প্ৰকাশ কৰা স্মৰণিকা "জেৰেঙা" উন্মোচন কৰে "উপনগৰীৰ প্ৰথম মহিলা" ৰশ্মিতা বৰুৱাই ।
সাংস্কৃতিক কাৰ্যসূচীৰ শুভাৰম্ভ কৰা হয় "নতুন যুগৰ নাৰী আমি গাওঁ পোহৰৰ গান" শীৰ্ষক সমবেত সংগীতেৰে । ক্ৰমান্বয়ে বৰগীত , দলীয় আধুনিক নৃত্য , বড়ো নৃত্য আৰু বিহু নৃত্য পৰিৱেশন কৰে সম্বয়ৰ সদস্যা সকলে ।
সাংস্কৃতিক কষৰ্যসূচীৰ মূখ্য আকৰ্ষণ আছিল সতী জয়মতীৰ জীৱন ভিত্তিক এখনি গীতি আলেখ্য ।
প্ৰতিটো কাৰ্যসূচী অতি সুন্দৰ আৰু আকৰ্ষণীয় ৰূপত সজাই তোলা সমন্বয়ৰ শিল্পীসকলক উপস্থিত দৰ্শকে ভূয়সী প্ৰশংসা কৰে ।
মঞ্চসজ্জা ,অতিথি আপ্যায়ণৰ ব্যৱস্থাও অতি কলাসুলভ আৰু সোৱাদ ভৰা আছিল বুলি উপস্থিত বিশিষ্ট অতিথি সকলে একেমুখে স্বীকাৰ কৰে ।
২০০৫ চনত জয়মতী দিৱস উদ্ যাপনেৰে আত্মপ্ৰকাশ কৰা উপনগৰীৰ সমন্বয় মহিলা সংস্থাই বিভিন্ন সময়ত বিভিন্ন কাৰ্যসূচী ৰূপায়ণ কৰি অহাৰ লগতে সমাজকল্যণমূলক কামকাজতো আগভাগ লৈ আহিছে ।
ষ্টাফ ৰিপৰ্টাৰ বঙাইগাঁও, প্ৰফুল্ল কুমাৰ দাস।