বকোত উত্তেজনা: বন বিভাগৰ ওপৰত অবৈধ কাঠ ব্যৱসায়ীসকলক সুৰক্ষা দিয়াৰ অভিযোগ

বকো, ৩ ছেপ্টেম্বৰ – বকোৰ কলিয়াবৰি গাঁৱত মঙলবাৰ নিশা এক উত্তেজনাপূৰ্ণ পৰিস্থিতি সৃষ্টি হয়। স্থানীয় ৰাইজে মূল্যবান সাগুন কাঠেৰে ভৰ্তি কৰা এখন বাহন   আটক কৰাৰ ফলত এই উত্তেজনা দেখা দেয়। এই ঘটনাই পুনৰ পশ্চিম কামৰূপ বন বিভাগৰ ওপৰত অবৈধ কাঠ ব্যৱসায়ীসকলৰ সৈতে আঁত ধৰা অভিযোগ উত্থাপন কৰিছে।

প্ৰত্যক্ষদৰ্শীৰ তথ্য মতে, TATA ACE (ৰেজিঃ নম্বৰ AS01 EC 2561) স্থানীয় ৰাইজে ৰখাই কাঠৰ মোলীয়া সামগ্ৰী উদ্ধাৰ কৰে। কিছু সময়ৰ পাছত বামুনিগাঁও বন শ্ৰেণীৰ বন কৰ্মচাৰীসকলে ঘটনাস্থলত উপস্থিত হয়। অভিযোগ অনুসৰি, ৰাইজক সমৰ্থন কৰাৰ পৰিৱৰ্তে বন কৰ্মচাৰীয়ে আকাশত গুলী ফুটাই স্থানীয় যুৱকসকলক ভয় দেখুৱায়।

স্থানীয়সকলে অভিযোগ উত্থাপন কৰি কয় — “প্ৰায় প্ৰতিদিনাই নিশা বকো–পইৰঙা পথেদি কাঠভৰ্তি যান-বাহনেৰে যাতায়াত কৰে। অথচ বন বিভাগ চকু মুদে থাকে। এই ঘটনা প্ৰথমবাৰৰ নহয়।”

সংঘৰ্ষৰ সময়ত দুই-তিনজন যুৱকক প্ৰহাৰ কৰা হৈছে বুলি অভিযোগ উঠিছে।

তাৰে বিদ্যুত দাস নামৰ এজনক বন কৰ্মচাৰীয়ে আটক কৰে। সামাজিক মাধ্যমত প্ৰকাশিত ভিডিঅ’ত আটক যুৱজনক বন কৰ্মচাৰীয়ে প্ৰহাৰ কৰা দৃশ্য দেখা যায় বুলি জনোৱা হৈছে। পাছত বকো আৰক্ষী উপস্থিত হৈ পৰিস্থিতি নিয়ন্ত্ৰণ কৰে।

এই ঘটনাই পুনৰ স্থানীয় সমাজত ক্ষোভৰ সঞ্চাৰ কৰিছে। ৰাইজৰ অভিযোগ, পশ্চিম কামৰূপ বন বিভাগে অবৈধ কাঠ ব্যৱসায়ীসকলৰ বিৰুদ্ধে কোনো কার্যকৰী পদক্ষেপ ল’ব পৰা নাই। বহু বাৰ যান-বাহন  জব্দ কৰা আৰু প্ৰতিবাদ অনুষ্ঠিত হোৱাৰ পাছতো ব্যৱসায়ীসকল জাল অব্যাহত থকাৰ ফলত বিভাগৰ দক্ষতা, জবাবদিহিতা আৰু স্বচ্ছতা সন্দৰ্ভত গম্ভীৰ প্ৰশ্ন উঠিছে।

এতিয়ালৈকে বন বিভাগ বা আৰক্ষীৰ পক্ষৰ পৰা এই ঘটনৰ বিষয়ে কোনো চৰকাৰী মন্তব্য প্ৰকাশ কৰা হোৱা নাই।