চৰকাৰৰ প্ৰতিশ্ৰুতি আৰু প্ৰতাৰণা শিক্ষাৰ মাধ্যম হিচাপে মিচিং ভাষা
শেহতীয়াকৈ বৰাকত উদ্ভৱ হোৱা অসমীয়া আৰু বাঙালীৰ সংঘাতে সকলোকে উদ্বিগ্ন কৰি তুলিছে৷অসমতেই অসমীয়া ভাষাক এলাগী কৰিব বিচৰা কাৰ্যক সাধাৰণতে কোনেও ইমান সহজভাৱে ল'ব নোৱাৰে৷ অসমীয়া ভাষাৰে লিখা বেনাৰত ক’লা ৰং সনা,২৪ ঘন্টাৰ ভিতৰত অসমীয়া ভাষাৰে লিখা হৰ্ডিং আাঁতৰাবলৈ একাংশ বাঙালী নেতাই দিয়া হুংকাৰে আচলতে কিহৰ ইংগিত দিছে ? বৰাকত সংঘটিত হোৱা এনে কৰ্মকাণ্ডৰ পৰা আমাৰ অনুমান হয় আচলতে এচাম সুযোগ সন্ধানীৰ কুটিল ৰাজনীতিহে,নহ'লে এনেদৰে ভাষা-সংস্কৃতিৰ বিৰুদ্ধে চক্ৰান্ত নকৰে৷জাতীয় আৱেগেৰে পৰিচালিত এগৰাকী জাতীয়তাবাদী নেতা সুস্থ মন-মগজুৰে নিয়ন্ত্ৰিত হ'লেহে এটা জাতিক সু-পৰিকল্পিতভাৱে আগবঢ়াই নিব পাৰে৷সম্প্ৰতি বৰাকৰ কৰ্মকাণ্ডবোাৰ দেখি-শুনি এনে ভাব হয় যে এচাম নেতাৰ অসমীয়া বিদ্বষে অসমীয়া জাতিৰ ঐক্য -সংহতিত আঘাত হনাৰ লগতে স্ব-জাতিকো বিপথে পৰিচালিত কৰিছে৷ আমি মনত ৰখা উচিত অসমত অসমীয়া ভাষা ৰাজ্যিক ভাষা৷ এখন ৰাজ্যত নানা ভাষা-ভাষীৰ লোক থাকে৷ তেনেস্থলত অসমত বসবাস কৰা সকলো জাতি-জনজাতিৰ আইৰ মুখৰ ভাষা সমান৷ এখন ৰাজ্যত কোনো ভাষাৰেই বলপূৰ্বক আধিপত্য চলিব নোৱাৰে৷এটা ভাষাৰ আধিপত্য বিস্তাৰ কৰিবলৈ যোৱা মানেই নানা ভাষা-ভাষীসকলৰ মাজত সংঘাত আৰু অসমীয়াৰ জাতীয় সংহতিত আঘাত সৃষ্টি হোৱা৷অসমীয়া জাতীয় সংহতিত আঘাত সৃষ্টি কৰি কোনো ভাষা অথবা জাতিয়ে উন্নতিৰ জখলাত বগাই যাব নোৱাৰে৷ঘৰৰ পদূলিৰ পৰা ওলাই যোৱা মাত্ৰকেই আমাৰ চৌপাশে বসবাস কৰি থকা নানা জাতি-উপজাতিৰ ককাই-ভাই-ভগ্নীহঁতৰ স’তে অসমীয়া ভাষাতেই ভাৱৰ আদান -প্ৰদান কৰি আমি এক সমন্বয়ৰ সাঁকো গঢ়ি তোলো৷আমাৰ জনগোষ্ঠীয় ভাইসকলকৰ বেচিভাগেই আজিও অসমীয়া মাধ্যমত পঢ়া-শুনা কৰে৷তেনেস্হলত অসমীয়া ভাষা প্ৰচাৰ আৰু প্ৰসাৰ কৰিবলৈ চৰকাৰৰ লগতে আমাৰ সকলোৰে দায়িত্ব আৰু কৰ্তব্য আছে৷
