Mising Lutad Digital News Network

গুৱাহাটী, ৭ ছেপ্টেম্বৰ – ভাৰত ৰত্ন স্বৰ্গীয় ড° ভূপেন হাজৰিকাৰ ওপৰত নিৰ্মিত ডকুমেণ্টাৰী *‘Bhupen da Uncut’*ৰ বহু প্ৰত্যাশিত প্ৰিমিয়াৰ আজি পুৱা ১১ বজাত গুৱাহাটীৰ অনুৰাধা চিনেপ্লেক্সত অনুষ্ঠিত হয়।

এই বিশেষ প্ৰিমিয়াৰ অনুষ্ঠানত উপস্থিত আছিল ভূপেন হাজৰিকাৰ পৰিয়ালৰ সদস্যসকল, ভক্ত-অনুৰাগী লগতে অসমৰ সাংস্কৃতিক আৰু ৰাজনৈতিক ক্ষেত্ৰৰ বিশিষ্ট ব্যক্তিসকল। ড° হাজৰিকাৰ জ্যেষ্ঠ পুত্ৰ তেজ হাজৰিকা পত্নী কেণ্ডেছ হাজৰিকা আৰু পুত্ৰ ছেজ আকাশ হাজৰিকাক লৈ আমেৰিকাৰ পৰা বিশেষভাৱে গুৱাহাটীলৈ আহি অনুষ্ঠানত অংশগ্ৰহণ কৰে। লগতে, ড° হাজৰিকাৰ ভায়েক তথা জনপ্ৰিয় গায়ক সমৰ হাজৰিকাও পৰিয়ালৰ অন্য সদস্যসকলৰ সৈতে অনুষ্ঠানত উপস্থিত থাকে।

প্ৰিমিয়াৰৰ আৰম্ভণিতে প্ৰযোজক-পৰিচালক ববিতা শর্মাই অভিবাদন জ্ঞাপন কৰি ডকুমেণ্টাৰীখনৰ বৈশিষ্ট্যৰ বিষয়ে আলোকপাত কৰে। তেওঁ উল্লেখ কৰে যে এই ডকুমেণ্টাৰীত ১৯৯৯ চনত ইংলেণ্ডত চিত্ৰায়িত অমূল্য আর্কাইভেল ফুটেজ অন্তৰ্ভুক্ত কৰা হৈছে। অনুষ্ঠানৰ অন্তত কাৰ্যকৰী প্ৰযোজক চিন্ময় শর্মাই ধন্যবাদ জ্ঞাপন কৰে।

ডকুমেণ্টাৰী প্ৰদৰ্শনৰ পাছত সমৰ হাজৰিকাই আবেগত উজাৰি কয় – “ভূপেন দা যেন পুনৰ জীৱন্ত হৈ উঠিল”। তেজ হাজৰিকা আৰু তেওঁৰ পৰিয়ালে ছবিখনৰ সমৃদ্ধি আৰু বৈচিত্ৰ্য প্ৰতি গভীৰ সন্তুষ্টি প্ৰকাশ কৰে।

প্ৰিমিয়াৰ অনুষ্ঠানত উপস্থিত থাকে সাহিত্য-সংস্কৃতি ক্ষেত্ৰৰ খ্যাতনামা ব্যক্তিসকল – মঞ্জু বোৰা, সঞ্জীৱ সভাপণ্ডিত, ৰুনু দেৱী, লোকনাথ গোস্বামী, মলবিকা বোৰা, প্রদীপ বৰুৱা, অনুৰাধা শৰ্মা পূজাৰী, উৎপল দত্ত, দীপান্নিতা জৈস্বাল আদি।

ইতিমধ্যে, দল-মত নিৰ্বিশেষে বিভিন্ন ৰাজনৈতিক নেতাসকলো অনুষ্ঠানত অংশগ্ৰহণ কৰে – পূৰ্বৰ সংস্কৃতি মন্ত্ৰী হেমপ্ৰভা শইকীয়া, পূৰ্বৰ মন্ত্ৰী তথা সাংসদ প্ৰদ্যুত বৰুৱা, কংগ্ৰেছ দলৰ নেতা দেবব্ৰত শইকীয়া, পূৰ্ব এপিচিচি সভাপতি ভূপেন কুমাৰ বৰুৱা, পূৰ্ব সংস্কৃতি মন্ত্ৰী বিস্মিতা গগৈ আৰু পূৰ্ব সাংসদ কুইন ওজা আদি।

*‘Bhupen da Uncut’*ত ভূপেন হাজৰিকাৰ ১৯৯৯ চনৰ ইংলেণ্ড ভ্ৰমণৰ এক বিশেষ কাহিনী সংৰক্ষিত আছে। এই ভ্ৰমণত তেওঁ অসমৰ মেডিকেল কলেজৰ চিকিৎসকসকলৰ উদ্যোগত আয়োজিত সাংস্কৃতিক অনুষ্ঠানত অংশগ্ৰহণ কৰিছিল। ফুটেজসমূহত ভূপেন্দাই নিজৰ শৈশৱৰ কাহিনী, জ্যোতি প্ৰসাদ আগৰৱালাৰ সৈতে সম্পর্ক, নিউ ইয়ৰ্কৰ শিক্ষাজীৱন, পত্নী প্ৰিয়ম্বদা পাটেলৰ সৈতে জীৱনযাত্ৰা আদি বিষয়ে অকপটে বৰ্ণনা কৰিছে। লগতে তেওঁৰ দর্শন-ভাবনা, মতাদৰ্শ আৰু কেতিয়াও প্ৰকাশ নকৰা কেইবাটাও কবিতাৰ আবৃত্তিও এই ছবিখনত অন্তৰ্ভুক্ত কৰা হৈছে।

ডকুমেণ্টাৰীখন পৰিচালনা আৰু প্ৰযোজনা কৰিছে ববিতা শর্মাই। কাৰ্যকৰী প্ৰযোজক চিন্ময় শর্মা, সম্পাদক তথা সৃষ্টিশীল পৰিচালক ৰবীন্দ্ৰ বাডগাইয়ান, চিত্ৰগ্ৰাহক চিন্ময় শর্মা আৰু আখ্যানৰ স্ক্ৰিপ্ট ৰচনা কৰিছে জিমনি চৌধুৰীয়ে।

খবৰ প্ৰস্তুত কৰিছে — Mising Lutad Digital News Network